Молитва за единство на семейството или енорията

Архим. Софроний оставя като духовно завещание на монасите от своя манастир „Молитвата за единство”. Тук публикуваме нейния вариант за миряни.

Господи Иисусе Христе, Агнче Божий, вземляй грех мира, восходом Твоим на Голгофскую гору искупил еси ны от клятвы законныя и восставил еси Твой падший образ.

На Кресте пречистей руце Твои прострый, да чада Божия расточенная собереши во едино, и ниспосланием Пресвятаго Духа в соединение вся призывавай.

Ты убо, Сый Отчее сияние, перед исходом Своим на сие великое мироискупительное священнодействие, молился еси Отцу Твоему, да будем вси едино, якоже Ты един еси со Отцем и Духом Святым, даждь убо нам благодать и мудрость исполнити сию заповедь на всяк день, и укрепи нас на подвиг тоя любве, юже заповедал еси нам рекий: да любите друг друга, якоже возлюбих вы.

Духом Твоим Святым даждь нам силу смирятися друг перед другом, поминая, яко аще кто больше любит, тот и больше смиряется; научи нас молитися друг за друга, нести тяготы друг друга в терпении и объедини нас союзом любве неразрушимая во едино стадо послушных овец о Имени Твоем святем, даруя нам и зрети в коемждо брате и сестре нашей образ Твоея неизреченныя славы и не забыти, яко брат наш есть наша жизнь.

Ей, Господи, собравый нас благоволением Твоим, сотвори нас быти воистину во едину семью, живущую единым сердцем, единей волей, единей любовию, яко един человек, по предвечному совету Твоему об Адаме первороднем.

Осени наш дом (или приход наш) духом страха Твоего, и покрый его покровом Пречистыя Твоея Матере и всех святых Твоих, благословляяй и заступаяй коегождо зде живущих (имена), сохраняя же нас всех от тлетворных помыслов, от неподобающих слов или движений сердечных, могущих разрушити священное дело нашего служения, яко да созиждется дом сей (приход сей) на камне евангельских Твоих заповедей местом исцеления, освещения и спасения, ради нас самих и ради всех притекающих семо, труждающихся и обремененных братьев и сестер наших, да обрящем вси покой в Тебе, кротком и смиренном Царе нашем, ныне и присно и во веки веков.

Аминь.

Според сборника с молитви на отец Софроний „Молитвеное приношение”, „Паломник”, М. 2004, с. 134-135.